கசிந்துருகும் உறைபிணி

சொல்லொனாத் துயரங்கொண்டு
நெஞ்சடைத்து சிந்தைக்குள்
சிக்கு விழ..

பேரிடிச் சத்தம்.
பெருமுகிழ்க் கூட்டம்.
இருள் சூழ..
கன மழையின் முன்னோட்டம் கண்டு
கச்சிதமாய் கூடு சேரும் பறவைகள்.

தென்றல் இசைத்திட
தன்னிசையில் தானே ஆடிடும்
பியானோவாய் - தென்னங்கீற்று.

உருண்டோடிடும் நதிநீர்
இடைபட்ட பாறையில் தடைபட்டு
இருபக்கமும் பிரிந்து..

..மறுபக்கம் குவிந்து
ஒருமித்ததொரு சங்கீதம் எழுப்ப

இறுகிப் பிடித்த இதயம்
இளகி
இயல்பாய் இசைத்தது.

படபடத்த நாடி
பதப்பட்டு
பக்குவமாய்
நாளங்களில் நளிந்தோடிட..
உள்ளம் உருகி 
கன்னங்களில் கசிந்தோடியது  
கவலை.

      ****