வங்க சினிமாவின் அடையாளமான மும்மூர்த்திகள் ரே கட்டக் மற்றும் சென். இவர்களுள் ரே மேட்டிமைக் கலைஞர். கட்டக் இடப்பெயர்வால் அல்லளுற்ற துயரை கலையாக்கியவர். சிதைவுகளையும் புத்துயிர்ப்பையும் செய்து காட்டி எப்பொழுதுமே தன்னையும் தன் கலையையும் மாற்றத்திற்கு தயாராக வைத்திருந்தவர் சென். அதனால் தான் அவரால் இப்படி சொல்ல முடிந்திருக்கிறது. 'சிதையக்கூடிய நம்பிக்கைகளை திடமாக மறுக்கிறேன். நான் வாழ்வை எதிர்கொள்கிறேன். போராடுகிறேன். பதற்றத்திலேயே வாழ்கிறேன். நான் வாழ்வதாலேயே யாவற்றையும் கடந்து பார்க்கிறேன். கனவு காண்கிறேன்'.